Կիրակի , 12 յունիսին ՝երեկոյեան ժամը 8:00-ին, ուժգին պայթում մը ցնցեց մայրաքաղաք Պէյրութը, երբ Վերտան-Զարիֆ շրջանին մէջ գտնուող «Պլոմ» դրամատան կեդրոնը ականահարումի թիրախ դարձաւ:
Լիբանանեան բանակն ու ապահովութեան ուժերը անմիջապէս փութացին դէպքին վայրը եւ իսկոյն ականահարուած տարածքը շրջափակեցին` ճշդելու համար պայթումին տեսակը:
Ապա ներքին ապահովութեան ուժերու ընդհանուր տնօրէն հազարապետ-զօրավար Իպրահիմ Պասպուս ուղղուեցաւ պայթումին վայրը, ուր ան հաստատեց, որ ականը, որ մօտ 15 քկ. պայթուցիկ նիւթ կը կշռէր, զետեղուած էր «Պլոմ» դրամատան պատին կից գտնուող ծաղկամանի մը մէջ:
Ան նշեց, որ բանակն ու ապահովութեան ուժերը կը շարունակեն հետաքննութիւնը:
Պասպուս նկատել տուաւ, որ ապահովութեան ուժերն ու բանակը տնտեսական եւ զբօսաշրջական բոլոր վայրերուն ապահովական կայունութեան կը հսկեն ամբողջ Լիբանանի տարածքին:
Զինուորական ատեանին մօտ կառավարութեան ներկայացուցիչ դատախազ Սաքըր Սաքըր իր կարգին այցելեց դէպքին վայրը: Ան նախապէս ներքին ապահովութեան ուժերու տեղեկահաւաքի բաժանմունքին յանձնած էր պայթումին վերաբերեալ հետաքննութիւն կատարելու պարտականութիւնը:
All the contents on this site are copyrighted ©. |